२१, चैत्र २०८१
बाँके। बाँके राष्ट्रिय निकुञ्जको खड्गवार हात्तीसारमा गणेशगज नामक हात्तीले आक्रमण गर्दा हात्तीको स्याहारमा खटिएका एक कर्मचारीको ज्यान गएको छ।
बर्दिया ठाकुरबाबा नगरपालिका–९ निवासी ४५ वर्षीय आशाराम थारुको घटनास्थलमै मृत्यु भएको बाँके राष्ट्रिय निकुञ्जका वरिष्ठ संरक्षण अधिकृत बीरेन्द्र कँडेलले जानकारी दिनुभयो।
कँडेलका अनुसार बुधबार राति ८ः३० बजेतिर थारु घाँस र दाना हाल्ने क्रममा गणेशगज हात्तीले थारुमाथि आक्रमण गरेको थियो। ‘पहिला सुँढले हानेर त्यसपछि किचेर मार्यो,’ प्रमुख कँडेलले भन्नुभयो।
थारु २०७३ सालदेखि खड्गवार हात्तीसारमा गणेशगजको स्याहार गर्दै आउनुभएको थियो। सोही वर्ष उहाँ बाँकेमा बर्दियाबाट उक्त हात्ती लिएर आउनुभएको थियो। ‘हात्तीलाई मात चढ्दा आक्रमण गर्ने सम्भावना हुन्छ,’ कँडेलले भन्नुभयो, ‘केही दिनदेखि गणेशगजको व्यवहार आक्रामक देखिएको थियो।’
घटनापछि थारुको शव नेपालगन्ज मेडिकल कलेज शिक्षण अस्पताल, कोहलपुरमा राखिएको छ। पोष्टमार्टमपछि परिवारलाई शव बुझाउने तयारी भइरहेको प्रहरीले जनाएको छ।
निकुञ्ज प्रशासनले गणेशगजलाई हाल नियन्त्रणमा राखिएको बताएको छ। प्रमुख कँडेलले भन्नुभयो‘हात्तीमा मात चढ्दा आक्रमक हुन्छ, अहिले यसलाई नियन्त्रणमा लिएर मात्रै व्यवस्थापन गरिन्छ।’ गणेशगजले यसअघि पनि माउतेमाथि आक्रमण गरिसकेको निकुञ्ज स्रोतले जनाएको छ।घटनाबारे थप अनुसन्धान भइरहेको छ।
