२३, चैत्र २०८१

बाँके ।नेपाल प्रधानाध्यापक संघ (PAN) बाँकेको पहलमा कोहलपुर नगरपालिका–१३, भरैयामा अवस्थित श्री बाल शिक्षा माध्यमिक विद्यालयको सभाहलमा आज “हाम्रो विद्यालय, हाम्रो दायित्व” शीर्षकमा सार्वजनिक बहस कार्यक्रम सम्पन्न भयो। सामुदायिक विद्यालयको सुधार, जीवन्त समस्याहरू र सम्भावनाहरूमा केन्द्रित रहेर गरिएको यो कार्यक्रम दुर्गम क्षेत्रमा शिक्षामा आमूल सुधार ल्याउने उद्देश्यका साथ आयोजना गरिएको हो।

कार्यक्रममा पूर्व जिल्ला शिक्षा अधिकारी एवं शिक्षा विज्ञ जीत बहादुर शाहले विद्यालय सुधार योजना निर्माण प्रक्रियामा सबै सरोकारवालाहरूको भूमिकाबारे महत्वपूर्ण प्रस्तुति दिनुभयो। डा. विष्णु के.सी.ले पाठ्यक्रम, शिक्षक तालिम र सिकाइको प्रभावका पक्षहरू उजागर गर्नुभयो। सुर्खेतका नारायण प्रसाद सिग्देलले “पढ्दै कमाउँदै” कार्यक्रमबारे आफ्नो दृष्टिकोण राख्नुभयो भने कौशिलानगरका विनोद शर्मा, बर्दियाकी आशा रजौरे, कोहलपुरका यमनाथ पौडेल, अर्जुन पौड्याल, तारा चन्द्र योगी लगायतले आ–आफ्ना अनुभव र सुझावहरू प्रस्तुत गर्नुभयो।

कार्यक्रमका विशेष अतिथिहरू टेक बहादुर डाँगी र विद्यालय व्यवस्थापन समितिका अध्यक्ष गणेश कुमार पुनले विद्यालयको विकासमा समुदायको भूमिकाबारे जोड दिनुभयो।

सार्वजनिक बहसबाट निकालिएका मुख्य निष्कर्षहरू यस्ता छन्:

१. विद्यालय सुधार योजना शिक्षक, अभिभावक, व्यवस्थापन समिति र अन्य सरोकारवालाहरूको समन्वयमा तयार गरी लागू गर्नुपर्ने।
२. विद्यालयको स्पष्ट दूरदृष्टि तय गरी त्यसअनुसार सबै पक्ष एकताबद्ध भएर अघि बढ्नुपर्ने।
३. पेशाप्रति समर्पित र अध्ययनशील शिक्षकहरू मात्र शिक्षण पेशामा टिक्न पाउने व्यवस्था लागू गर्नुपर्ने।
४. समयमै पठनपाठन सुरु गर्न योजना बनाएर कार्यान्वयन गर्नुपर्ने।
५. अभिभावकहरूको सक्रिय सहभागिता र निगरानी विद्यालय सुधारमा अपरिहार्य हुने।
६. विद्यार्थी अनुशासन र देशप्रेम अभिवृद्धिका लागि सांगीतिक, भाषिक, र कलात्मक कार्यक्रमहरूको सञ्चालन गर्नु पर्ने।
७. विद्यालय सुरु हुनुभन्दा ३० मिनेट अघिदेखि शिक्षक तथा कर्मचारीहरू उपस्थित हुनुपर्ने।
८. विद्यालयको जग्गा सम्बन्धी समस्या समाधानमा वि. व्य. स. अध्यक्ष गणेश कुमार पुनको नेतृत्वमा पहल भइरहेकाे जनाइएको छ।
९. शिक्षक र विद्यार्थी दण्ड–पुनरुत्थान र पुरस्कार प्रणाली लागू गरिने सिफारिस।

विद्यालय, शिक्षक, अभिभावक र समुदायको साझा प्रयासमा भरैयाजस्ता दुर्गम क्षेत्रका विद्यालयहरूको सुधार सम्भव छ भन्ने सकारात्मक सन्देश यो बहसले दिएको छ। कार्यक्रममा सहभागी सबैप्रति आयोजक संस्था नेपाल प्रधानाध्यापक संघ (PAN) बाँकेले विशेष आभार व्यक्त गरेको छ।