२३, चैत्र २०८१
बाँके ।नेकपा (एकीकृत समाजवादी)का अध्यक्ष माधवकुमार नेपालले २०६२–६३ को जनआन्दोलनले दिलाएका उपलब्धिहरू गुम्न नदिने स्पष्ट पार्नुभएको छ।
एकीकृत समाजवादी पार्टी लुम्बिनी प्रदेश, बाँके जिल्ला कमिटी र कोहलपुर नगर कमिटीद्वारा शनिबार आयोजित श्रद्धाञ्जली सभामा बोल्दै अध्यक्ष नेपालले जनआन्दोलनको उपलब्धि उल्ट्याउन केही प्रतिक्रियावादी तत्वहरू लागिपरेको बताउँदै त्यसविरुद्ध समाजवादी मोर्चाले गरेको प्रदर्शनले उनीहरू अत्तालिएको टिप्पणी गर्नुभयो।
उक्त कार्य
क्रम पार्टीका पोलिटब्युरो सदस्य तथा बाँकेका अग्रज नेता स्वर्गीय अशोक कोइरालाको १३औँ दिनको पुण्यतिथिको अवसरमा आयोजना गरिएको थियो।
अध्यक्ष नेपालले कोइरालाले विद्यार्थी राजनीतिबाट यात्रा थालेकाे स्मरण गर्दै बाँके, बर्दिया र लुम्बिनी प्रदेशभरि पार्टी निर्माणमा पुर्याएको योगदान अविस्मरणीय रहेको बताउनुभयो।
कार्यक्रममा पार्टीका केन्द्रीय उपाध्यक्ष प्रकाश ज्वालाले कोइरालासँग विद्यार्थी जीवनदेखि राजनीतिक सहयात्रा गर्दै आएको जनाउँदै उहाँ कोहलपुरको विकासका लागि जीवनभर समर्पित असल योद्धा रहेको बताउनुभयो।
सभामा संविधानसभा सदस्य देवराज भार, नेपाली कांग्रेस बाँके सभापति नारायणप्रसाद गौडेल, नेकपा माओवादीका केन्द्रीय सदस्य आइपी खरेल, रास्वपाका जिल्ला सदस्य राजेन्द्रप्रसाद श्रेष्ठ लगायतले कोइरालाको निस्वार्थ योगदानको चर्चा गर्दै पार्टीभन्दा माथि उठेर समाजसेवामा होमिएको व्यक्तित्व गुमाउनु पीडादायी रहेको धारणा व्यक्त गरे।
सभामा उपमहासचिव मेटमणि चौधरी, केन्द्रीय सचिव सोमप्रसाद पाण्डे, पोलिटब्युरो सदस्यहरू दामोदरप्रसाद अर्याल, अब्दुल हुसेन खाँ, संविधानसभा सदस्य निर्मल सुवेदी लगायतको उपस्थिति रहेको थियो।
सभालाई सम्बोधन गर्दै स्व. कोइरालाकी धर्मपत्नी मञ्जु कोइरालाले उहाँको अधुरो सपना पूरा गर्न आफू निरन्तर लागिरहने बताउँदै दुःखको यस घडीमा साथ र सम्झना गर्ने सबैप्रति हार्दिक आभार प्रकट गर्नुभयो।
श्रद्धाञ्जली सभा पार्टी बाँके अध्यक्ष इन्द्रबहादुर थापाको अध्यक्षतामा सम्पन्न भएको थियो भने सञ्चालन सचिव दीपक जिएमले गर्नुभएको थियो।
