२३, चैत्र २०८१
जुम्ला।जुम्लाको ऐतिहासिक सिंजा क्षेत्रका नागरिकहरू अब महँगो खर्च गरेर सदरमुकाम धाउनुपर्ने बाध्यताबाट मुक्त भएका छन्। सिंजा गाउँपालिका–३ नराकोटमा शुक्रबार भूमि व्यवस्था, सहकारी तथा गरिबी निवारण मन्त्री बलराम अधिकारीले नापी तथा मालपोत कार्यालयको उद्घाटन गरेसँगै स्थानीयवासीलाई घरआँगनमै सेवा उपलब्ध हुने भएको हो।
यो कार्यालयमार्फत सिंजा क्षेत्रका तीन गाउँपालिका—हिमा, सिंजा र कनकासुन्दरीका नागरिकहरूले जग्गा नामसारी, खरिदबिक्री, नक्सा पास, राजीनामा लगायतका सेवा सहज रूपमा पाउनेछन्। उद्घाटन कार्यक्रममा मन्त्री अधिकारीसहितको टोलीलाई स्थानीयले पञ्चेबाजासहित भव्य स्वागत गरेका थिए।
स्थानीयवासी मोति दमाई भन्छन्, “अब सेवा लिन आफ्नै घरको खाना खाएर पुग्ने भयो, महँगो खर्च गरेर सदरमुकाम बस्नुपर्ने बाध्यता हट्यो।” उनका अनुसार, यसअघि एउटा कामका लागि सदरमुकाम पुगेर हप्ता दिन होटलमा बस्दा १०–१५ हजार रुपैयाँ खर्च हुने गर्थ्यो।
सिंजामा नापी र मालपोत कार्यालय स्थापना सङ्घीयता कार्यान्वयनपछि आएको महत्वपूर्ण उपलब्धि हो। मन्त्रालयका अनुसार कार्यालयको दिगो व्यवस्थापन र प्रभावकारी सेवा प्रवाहका लागि आवश्यक सहयोग गरिनेछ।
गत पुस ९ गतेको मन्त्री परिषद्को निर्णयअनुसार स्थापना प्रक्रिया अघि बढाइएको हो। करिब २१/२२ पटकको पहलपछि मात्र निर्णय कार्यान्वयनमा आएको स्थानीय नेताहरूले जनाएका छन्। अब तीन पालिकाका हजारौं नागरिकहरू आफ्नो अधिकार र सेवा सहज पहुँचभित्र पाउने भएपछि यो सेवा सुरुवातले ऐतिहासिक महत्व बोकेको स्थानीयको विश्वास छ।
