२३, चैत्र २०८१
बाँके । होटल पौवाले आफ्नो नवौं वार्षिकोत्सवको अवसरमा नेपालगञ्जसहित देशभरका सबै शाखामा ‘स्वाद उत्सव’ आयोजना गर्ने भएको छ। चैत्र २५ देखि २९ गतेसम्म सञ्चालन हुने उक्त उत्सवको सम्पूर्ण तयारी पूरा भएको जानकारी आज नेपालगञ्जमा आयोजित पत्रकार भेटघाटमा दिइएको हो।
पौवा व्यवस्थापनका अनुसार स्वाद उत्सवको मुख्य उद्देश्य मौलिक नेपाली खानाको स्वाद, संस्कृति र परम्परागत आतिथ्य भावलाई राष्ट्रिय तथा अन्तर्राष्ट्रियस्तरमा चिनाउने रहेको छ। उक्त उत्सवमार्फत पाहुनाहरूलाई नि:शुल्क रूपमा परम्परागत स्वादको अनुभव दिलाउने व्यवस्था गरिएको छ।
पौवाका सिओओ कृष्ण गौतमका अनुसार उत्सव देशभरका शाखाहरूमा एकैसाथ सञ्चालन हुनेछ। स्वाद उत्सवका लागि दुई लाखभन्दा बढी स्थानीय तथा बाह्य पाहुनालाई प्रत्यक्ष भेट गरी निमन्त्रणा दिइएको जानकारी दिँदै, गौतमले सेफहरूबीचको स्वस्थ प्रतिस्पर्धाबाट गुणस्तरीय खाना तयार पार्ने प्रयास पनि उत्सवको उद्देश्य भएको बताए।
होटल पौवाका अध्यक्ष दुर्गा प्रसाद भण्डारीले नेपालगञ्जमा करिब १ अर्ब लगानीमा ‘पौवा वेष्टर्न’ पाँच तारे होटल निर्माणको पहिलो चरण सम्पन्न भएको जानकारी गराउँदै भने, “नेपालगञ्जको होटलमा नेपाली आतिथ्यभित्र अन्तर्राष्ट्रिय सुविधा उपलब्ध हुनेछ।” सो होटलमा ५ वटा रेष्टुरेन्ट, ४ वटा सभा हल, १४ वटा मिटिङ हल, ९६ डिलक्स रुम, स्वीट रुम, क्यासिनो, स्पा, स्विमिङ पूल र जिमको सुविधा एकै छानामुनि रहनेछ।
पौवाले विगत ९ वर्षमा लुम्बिनी प्रदेशका प्रमुख पर्यटकीय स्थलहरूदेखि काठमाडौं, सौराहा, पोखरा, धनगढी, झिंगामारा, खोटाङ हलेसी, सिन्धुली मुलकोट लगायत देशका विभिन्न भूभागमा सेवा विस्तार गरिसकेको छ। अब पाल्पाको झिंगामारामा “पौवा बनवास रिसोर्ट” संचालनमा ल्याउने तयारीमा छ भने जनकपुर, गण्डकी तथा सिन्धुली सदरमुकाममा नयाँ शाखा खोल्ने योजना अघि बढाइएको छ।
अध्यक्ष भण्डारीले पौवाको उद्देश्य नेपाली स्वाद र आतिथ्य संस्कारलाई विश्वस्तरमा चिनाउँदै देशभित्रै रोजगारी सिर्जना गर्नु रहेको बताए। “पर्यटन क्षेत्रले देश चिनाउँछ, र स्थानीय उत्पादनको खपत गर्दै आम्दानीको स्रोत विस्तार गर्छ,” भण्डारीले भने, “पौवा सबै धर्म, संस्कृति र चाडपर्वको सम्मान गर्दै नेपालीपन झल्किने सेवा प्रवाहमा प्रतिबद्ध छ।”
