२३, चैत्र २०८१
बाँके ।बाँके क्षेत्र नं. १ का प्रतिनिधिसभा सदस्य सूर्य ढकालले संसदमा आफ्नो धारिलो मन्तव्य राख्दै गणतन्त्र, संघीयता र लोकतान्त्रिक व्यवस्थाको सशक्त पक्षमा दृढ प्रतिबद्धता जनाएका छन्। उनले सभामुख समक्ष बोल्दै भने, “दलीय व्यवस्थाको विकल्प एकदलीय व्यवस्था हुन सक्दैन। गणतन्त्रको विकल्प राजतन्त्र हुन सक्दैन। संघीयताको विकल्प एकात्मक राज्य व्यवस्था हुन सक्दैन।”

सांसद ढकालले परिवर्तनको मार्गमा सामन्ती सोच बाधक रहेको उल्लेख गर्दै भने, “सामन्तीवादी राज्य व्यवस्था समृद्धिको बाधक हो, सुशासनको बाधक हो। त्यो जनतालाई रैती र दास बनाउने सोच हो, जसले जनमत र विधिको शासनलाई उपेक्षा गर्छ।”

उनले गणतन्त्र र नेताहरूको आलोचना गर्ने पाँच प्रकारका व्यक्तिहरूको व्याख्या गर्दै भने, “देशलाई अस्थिरतातर्फ डोर्‍याएर स्वार्थको रोटी सेक्न खोज्नेहरू मात्र गणतन्त्रको विरोध गर्छन्।” उनले गणतन्त्रलाई सुधार र सचेतनाको प्रक्रिया बताउँदै यो व्यवस्थाले जनतालाई ‘रैती’ बाट ‘मालिक’ बनाउने कुरा दोहोर्‍याए।

सांसद ढकालले नेपालको राजनीतिक इतिहासमा नेताहरूले एकै समयमा चार गम्भीर विषय सम्हालेर मुलुकलाई अग्रगमनको बाटोमा डोर्‍याएको उल्लेख गरे। उनले भने, “एकात्मक व्यवस्थालाई संघीयतामा रूपान्तरण, सशस्त्र द्वन्द्वलाई शान्ति प्रक्रियामा रूपान्तरण, संविधान जारी गर्नु र जातीय/क्षेत्रीय मुद्दाको सम्बोधन — यी सबै ऐतिहासिक कार्य हुन्। अब समृद्धिको यात्राको नेतृत्व युवा पुस्ताले गर्नुपर्छ।”

सांसद ढकालले राप्ती सोनारी गाउँपालिका–३ मा पर्ने सरस्वती माविदेखि नारायणपुरसम्मको १७०० मिटर हुलाकी सडक अझै कालोपत्र नभएको विषयमा पनि सदनमार्फत ध्यानाकर्षण गराए। उनले सो सडक निर्माणका लागि स्थानीय तहदेखि संघसम्म निवेदन दर्ता भएपनि अझै बजेट सुनिश्चित नभएको उल्लेख गर्दै प्रश्न गरे, “बजेट पार्न कति निवेदन दर्ता गर्नुपर्छ? सरकार र सभामुखमार्फत उत्तर पाउन चाहन्छु।”