२२, चैत्र २०८१
बाँके ।बाँकेको राप्तीसोनारी गाउँपालिका–७ स्थित खल्ला झगडिया र आसपासका क्षेत्रहरूमा राप्ती नदीले तीव्र रूपमा गरिरहेको कटान नियन्त्रणका लागि लुम्बिनी प्रदेश सरकारले ५० लाख रुपैयाँ बजेट विनियोजन गरेको छ।
नदीको कटान गाउँ पस्ने जोखिम बढेपछि लुम्बिनी प्रदेश विपद् व्यवस्थापन परिषद्को बैठकले तत्काल तटबन्ध निर्माणको काम अघि बढाउने निर्णयसहित सो बजेट विनियोजन गरेको हो।
बाँके क्षेत्र नं. १ का प्रतिनिधिसभा सदस्य सूर्य ढकालका अनुसार, “सम्माननीय प्रधानमन्त्री र मुख्यमन्त्रीको निर्देशनपछि तत्काल काम अघि बढाउन बजेट विनियोजन भएको छ, आगामी बजेटमा थप बजेट विनियोजन हुने आशा राखेका छौं।”
सांसद ढकालको आग्रहमा केही महिना अघि मुख्यमन्त्री चेतनारायण आचार्य स्थलगत अनुगमन तथा निरीक्षणका लागि खल्ला झगडिया पुग्नुभएको थियो। त्यसअघि ढकालले प्रधानमन्त्री केपी शर्मा ओलीको ध्यानाकर्षण गराउँदै राप्ती नदी कटान नियन्त्रणमा सरकारी ध्यान पुर्याउन संसदमा समेत पटक–पटक आवाज उठाउनुभएको थियो।
स्थानीय बासिन्दासहित ढकालको नेतृत्वमा प्लेकार्डसहित प्रदर्शन गरिएको कटानस्थलमै बजेट विनियोजनमा भूमिका खेलेको मानिएको छ। सांसद ढकालले वर्षायाममा पानीको बहाव बढ्दा राप्तीसोनारी–७ र नरैनापुर गाउँपालिका अत्यधिक प्रभावित हुने भएकाले तत्काल तटबन्ध आवश्यक रहेको स्पष्ट पार्नुभयो।
यसअघि अस्थायी तटबन्ध भत्किएपछि बजेटको अभावले पुनर्निर्माण हुन नसक्दा कटान अझ तीव्र भएको थियो। अहिलेको बजेटले तत्कालीन समाधानका लागि राहत दिने विश्वास लिइएको छ।
