२०, चैत्र २०८१
गुल्मी।गुल्मी अस्पतालको भवन निर्माण कार्य निर्धारित दुई वर्षमा सक्नुपर्ने भए पनि चार वर्ष बित्दा पनि सम्पन्न हुन सकेको छैन। सम्झौता अनुसार २०७८ असार १८ गते पुनर्निर्माण प्राधिकरण र स्वच्छन्द–बानियाँ जेभी हेटौँडा, मकवानपुरबीच २५ करोड ९५ लाख ६४ हजार २०३ रुपैयाँ लागतमा २०८० असार १७ गतेभित्र निर्माण सम्पन्न गरिसक्नुपर्ने थियो। तर, करिब चार वर्ष पुग्न लाग्दा पनि हालसम्म ८४ प्रतिशत मात्र काम सकिएको छ।
निर्माण व्यवसायीका अनुसार सुविधासम्पन्न साढे पाँच तलाको भवन २०८२ असार मसान्तभित्र सक्ने गरी समयावधि थप गरिएको छ। हाल भवनको सबै तलाको ढलान सम्पन्न भइसकेको छ भने फिनिसिङ र वायरिङ लगायतका कार्य भइरहेका छन्।
निर्माण व्यवसायीका इन्जिनियर आदित्य नारायण ठाकुरका अनुसार चिसो मौसम, अविरल वर्षा, प्रारम्भिक चरणमा कोभिड महामारी, निर्वाचनका बेला निर्माण सामग्रीको उच्च मूल्यवृद्धि, गिट्टी–बालुवाको अभाव जस्ता कारणले काम समयमा सम्पन्न गर्न नसकिएको हो। तर, अबको दुई महिनाभित्रै निर्माण कार्य पूरा गर्ने प्रतिबद्धता उनले व्यक्त गरेका छन्।
गुल्मी अस्पतालमा हालका भवनहरू साना र सेवाग्राहीमैत्री नहुँदा समस्या भइरहेका छन्। अस्पताललाई छिटोभन्दा छिटो नयाँ भवन हस्तान्तरण गराउन नियमित खबरदारी गर्दै आएको गुल्मी अस्पताल विकास समितिका अध्यक्ष गोपालप्रसाद पाण्डेले बताए। तर, निर्माण व्यवसायीको ढिलासुस्तीका कारण समयमै काम सम्पन्न गर्न नसकिएको उनको भनाइ छ।
गुल्मी अस्पताल तम्घास २०७१ सालमा ५० शय्यामा स्तरवृद्धि भएको थियो। तर, भौतिक संरचनाको अभावका कारण अझै पूर्ण रूपमा सञ्चालनमा आउन सकेको छैन। स्थानीयहरू अस्पताल भवन निर्माण कार्यलाई यथाशीघ्र पूरा गर्न सरोकारवालाहरूको ध्यानाकर्षण गराएका छन्।
