सरला सुवेदी 

९, फल्ल्गुन २०८१

बाँके । भारतीय पर्यटकलाई नेपाल प्रवेशमा सहजता प्रदान गर्न माग गर्दै पर्यटन विभागद्वारा बाँके क्षेत्र नं. १ का संघीय सांसद माननीय सूर्य प्रसाद ढकाललाई ज्ञापन पत्र बुझाइएको छ। ज्ञापन पत्रमा भारतीय पर्यटकलाई नेपालगन्ज हुँदै प्रवेश गर्दा भोग्नुपर्ने प्रशासनिक असहजता हटाई व्यवसायिक वातावरण सुधार गर्न माग गरिएको छ।

नेपालगन्जको जमुनाहा नाका पश्चिम नेपालको प्रमुख भन्सार नाका भएकाले भारतबाट आउने पर्यटकहरूको संख्या उल्लेखनीय छ। तर, प्रशासनिक निकायबाट सौतेलो व्यवहार भइरहेको भन्दै पर्यटन व्यवसायीहरू असन्तुष्ट छन्। पर्यटन विभागका सचिव रंग बहादुर खड्का र पर्यटन विभाग प्रमुख एक नारायण चापागाईंको नेतृत्वमा बुझाइएको ज्ञापन पत्रमा भारतीय पर्यटक आकर्षित गर्न विशेष योजना बनाउनुपर्ने उल्लेख छ।

नेपालगन्ज क्षेत्रमा हाल सातवटा क्यासिनो, आठवटा स्टार होटल, तथा उच्चस्तरीय रेस्टुरेन्टहरू सञ्चालनमा छन्। यी क्षेत्रमा भारतीय पर्यटकको संख्यात्मक वृद्धि आर्थिक समृद्धिको आधार बन्न सक्ने व्यवसायीहरूको भनाइ छ। उनीहरूका अनुसार अन्य देशहरूमा पर्यटकलाई विशेष प्राथमिकता दिइन्छ, तर नेपालमा भारतीय पर्यटकलाई सहज पहुँच दिनुको साटो विभिन्न प्रतिबन्ध लगाइएको छ। विशेष गरी, सीमित भारतीय रुपैयाँ मात्र ल्याउन पाइने सरकारी नीतिले भारतीय पर्यटकहरूको खर्च गर्ने क्षमता प्रभावित भइरहेको छ।

ज्ञापन पत्र बुझेपछि सांसद सूर्य प्रसाद ढकालले भने, “नेपालगन्ज पश्चिम नेपालको मुख्य व्यापारिक नाका हो। यहाँ भारतीय पर्यटकहरूको आगमन सहज बनाउन आवश्यक नीति तथा कार्यक्रम संसदमा उठाउनेछु। पर्यटन व्यवसाय प्रवर्द्धनका लागि सहजीकरण गर्न सक्ने सबै उपाय अवलम्बन गरिनेछ।”

पर्यटन व्यवसायीहरूको मागलाई सम्बोधन गर्दै सांसद ढकालले सम्बन्धित निकायहरूसँग समन्वय गरेर समस्या समाधान गर्ने प्रतिबद्धता जनाएका छन्।