७, फाल्गुन २०८१
बाँके। नेकपा एमाले बाँके जिल्ला कमिटीको तेस्रो पूर्ण बैठक बैजनाथ गाउँपालिका गाबर भ्यालीमा सम्पन्न भएको छ। बैठकमा पार्टीका संगठनात्मक सुदृढीकरण, सदस्यता नवीकरण, प्रशिक्षण कार्यक्रम, चुनावी तयारी लगायतका विषयमा महत्वपूर्ण निर्णयहरू पारित गरिएको छ।
बैठक जिल्ला कमिटीका अध्यक्ष निरक गुरुङको अध्यक्षता तथा प्रदेश इन्चार्ज पद्मा अर्यालको प्रमुख आतिथ्यमा भएको थियो। कार्यक्रममा केन्द्रीय कमिटीका सदस्यहरू, सल्लाहकार परिषद्का सदस्यहरू, प्रदेश कमिटीका पदाधिकारीहरू तथा विभिन्न संगठनका प्रमुखहरूको उपस्थिति रहेको थियो। बैठकमा केन्द्र र प्रदेशका सर्कुलरहरू अध्ययन गर्दै संगठन सुदृढीकरणका रणनीतिहरू तय गरिएको थियो।
बैठकमा ८१ वडाका वडा इन्चार्ज, २३ वटा जनवर्गीय संगठनका प्रमुखहरू, क्षेत्रीय कमिटीका संयोजकहरू तथा प्रदेश क र ख का संयोजकहरूले आ–आफ्नो रिपोर्ट प्रस्तुत गरेका थिए। कार्यक्रममा पार्टीका केन्द्रीय सदस्यहरू सूर्य ढकाल, शान्ति ढकाल, पशुपति दयाल मिश्र, दीपा शर्मा, विजय धिताल लगायतका नेताहरूले बैठकको महत्त्वबारे सम्बोधन गरेका थिए।
बैठकले संगठनलाई थप व्यवस्थित बनाउन बाँकी रहेका टोल कमिटीहरू फागुन मसान्तभित्र गठन गर्ने तथा जनवर्गीय संगठनका वडा कमिटीहरू निर्माण गर्ने निर्णय गरेको छ। साथै, फागुन ८ गतेबाट पार्टी सदस्यता नवीकरण अभियान औपचारिक रूपमा सुरु गरिने छ, जसमा केन्द्रीय, प्रदेश, जिल्ला तथा स्थानीय नेताहरूको अनिवार्य सहभागिता रहनेछ।
पार्टीको संगठनलाई थप सबल बनाउन ८१ वडामा युवा तथा महिलाहरूका लागि वडास्तरीय प्रशिक्षण कार्यक्रम सञ्चालन गरिनेछ। यस्तै, फागुन २४ गते पार्टीबाट विगतमा उम्मेदवार भएका नेताहरूका लागि विशेष अभिमुखीकरण कार्यक्रम आयोजना गरिनेछ, जसमा पार्टी महासचिव शंकर पोखरेल र प्रदेश इन्चार्ज पद्म अर्याल प्रमुख वक्ताको रूपमा रहनेछन्।
बैठकले यही फागुन ५ गते हुने स्ववियु निर्वाचनमा पार्टी कमिटीलाई पूर्ण रूपमा परिचालित गर्ने निर्णय गरेको छ। साथै, फागुन २५ गते विद्यार्थीहरूको विशेष भेला आयोजना गरिनेछ। फागुन २४ गते श्रमिक दिवसको अवसर पारेर महिलाहरूको उपस्थितिमा जिल्लास्तरीय कार्यक्रम आयोजना गरिने छ।
पार्टी निर्माणमा मिडियाको भूमिकालाई आत्मसात गर्दै प्रेस चौतारीको आयोजनामा मिडिया प्रशिक्षण कार्यक्रम सञ्चालन गर्ने निर्णय पनि बैठकले गरेको छ। चैत ७ गतेदेखि टोल स्तरीय प्रशिक्षण कार्यक्रम सञ्चालन गरिनेछ भने चैत २९ गते पार्टी अध्यक्षको प्रमुख आतिथ्यमा जिल्लास्तरीय कार्यकर्ता भेला आयोजना गरिने छ।
बैठकले संगठनात्मक, वैचारिक, सामाजिक तथा रचनात्मक गतिविधिहरूलाई प्रभावकारी बनाउन ‘दिगदर्शन’ नामक दस्तावेज प्रकाशन गर्ने जिम्मेवारी प्रेस चौतारीलाई दिएको छ। पार्टीलाई थप सुदृढ गर्दै अघि बढ्न बैठकले गरेका निर्णयहरू महत्वपूर्ण रहेको नेताहरूले बताएका छन्।
