६, फाल्गुन २०८१
काठमाडौं।राष्ट्रिय प्रजातन्त्र पार्टी (राप्रपा)का सांसद धवलशमशेर राणाले नेपाललाई धर्मनिरपेक्ष राष्ट्र बनाउन अमेरिकाले १४ अर्ब रुपैयाँ लगानी गरेको भन्ने विषयमा छानबिन गर्न माग गरेका छन्।
आइतबारको प्रतिनिधि सभाको बैठकको आकस्मिक समयमा सांसद धवल शमशेर राणाले २०६२/६३ को जनआन्दोलनपछि नेपाल नेपाललाई धर्म निरपेक्ष राष्ट्र घोषणा गरिनुको पछाडि शंकास्पद रहेको भन्दै छानबिन गर्न माग गरेका हुन्।
उनले तत्कालीन भारतीय प्रधानमन्त्री मनमोहन सिंहको पालामा अमेरिकाले धर्मनिरपेक्ष राष्ट्र बनाउन १४ अर्ब रुपैयाँ खर्च गरेको दाबी गरेका छन्।
उक्त विषयले भारतमा हंगामा भइरहेको अवस्थामा नेपालले यो विषयलाई गम्भीरतापूर्वक लिनुपर्ने बताए। सांसद राणाले नेपाललाई धर्मनिरपेक्ष बनाउन लगानी गरेको हो होइन भन्ने विषयमा कुटनीतिक नोट मार्फत अमेरिकी सरकारलाई सोध्न माग गरेका छन्। र अमेरिकाले दिएको जानकारी नेपालको प्रतिनिधि सभाले जानकारी पाउनुपर्ने उनको धारणा छ।
त्यस्तै, सांसद राणाले नेपाललाई विदेशीको प्रभावमा धर्मनिरपेक्ष बनाइएको भन्दै राजासहितको धर्म सापेक्ष राष्ट्र पुनस्थापित गर्न ढिला गर्न नहुने बताए।
यस्तो छ राणा प्रतिनिधिसभा बैठकमा राखेको धारणा:अमेरिकाबाट केही दिन अगाडि सभामुखज्यू भारतको प्रतिनिधि सभामा जोडदार कुरा उठेको छ। कि अमेरिकाबाट १०० मिलियनभन्दा अर्थात् १४ अरब रुपैयाँ नेपालमा धर्मान्तरणको लागि प्रयोग भएको छ। यो कुरा पूर्व प्रधानमन्त्री मनमोहन सिंहको बेलाको कुरा भएको हो। र अहिले इन्डियामा यो ठूलो हंगामा भएको छ। यो कुरा नेपालमा सरकारले यसको चासो हामी पनि बोलिरहेको छैन। रचना आन्दोलन २ मा नेपाललाई किन धर्म निरपेक्ष रास्ट्र बनाइयो भन्ने कुरा बल्ला खुल्न आइरहेको छ। यो विषयमा छानबिन हुनुपर्यो। यो प्रतिनिधि सभालाई विनम्र अनुरोध गर्न चाहन्छु यो विषयमा छानबिन हुनुपर्छ । र अब म यो प्रतिनिधि सभालाई विनम्र अनुरोध गर्न चाहन्छु कि ९४ प्रतिशत हामी ओमकार परिवार बसोबास भएको राष्ट्रमा यो कुरा कसैको चित्त बुझेको छैन। पुन यो राष्ट्रलाई राजासहित धर्म निरपेक्ष देश बनाउन आग्रह गर्न चाहन्छु। धेरै समय छैन सभामुख महोदय जनताले आन्दोलन गर्नेछन्। हामी चुप लागेर बस्ने अवस्था छैन। यो विषयमा के कसो भएको हो भन्ने कुरा जानकारीमा लिन अमेरिकालाई डिप्लोम्याटिक नोट पठाउन आग्रह गर्दछु। र अमेरिकी सरकारको जवाफ यो सदनमा पेश होस् भन्ने जोडदार माग गर्दछु।