२७, माघ २०८१
बाँके ।बाँकेको कोहलपुर नगरपालिका वडा नं. ११ स्थित कोहलपुर नगर विकास समितिको क्रिकेट मैदान वरपरको करिब २८ बिघा क्षेत्र लामो समयदेखि अतिक्रमणमा परेको विषयमा प्रधानमन्त्री केपी शर्मा ओलीसमक्ष आज ध्यानाकर्षण गराइएको छ।
सङ्घीय सांसद सूर्यप्रसाद ढकाल, कोहलपुर नगरप्रमुख पूर्णप्रसाद आचार्यसहित बाँकेका जनप्रतिनिधि र विभिन्न राजनीतिक दलका प्रतिनिधिले प्रधानमन्त्री निवास बालुवाटारमा भेट गरी अतिक्रमित जग्गा फिर्ता गराइदिन विशेष पहल गर्न आग्रह गरेका छन्।
जिल्लास्तरमा सर्वदलीय बैठक बसेर अतिक्रमित जग्गामा बनेका घरटहरा हटाउन अनुरोध गरिए पनि गृह मन्त्रालयबाट सूचना प्रकाशन भइसकेपछि समेत अतिक्रमणकारीहरूले अटेर गरेको भन्दै उच्चस्तरीय पहल आवश्यक रहेको प्रतिनिधिमण्डलले प्रधानमन्त्रीसमक्ष राखेका छन्।
भेटवार्ताको क्रममा प्रधानमन्त्री ओलीले राज्यको सम्पत्ति कसैले अवैध रूपमा अतिक्रमण गर्न नपाउने र कुनै पनि अनियमितता सह्य नहुने स्पष्ट पार्दै, सरकारले अतिक्रमित जग्गा फिर्ता ल्याएरै छाड्ने दृढता व्यक्त गर्नुभएको छ।
