२७, माघ २०८१
बाँके ।संघीय संसदको प्रतिनिधि सभाको आजको बैठकमा जनमत पार्टीका राष्ट्रिय उपाध्यक्ष तथा सांसद अब्दुल खानले विभिन्न जनसरोकारका विषयमा आवाज उठाउँदै सरकारको गम्भीर ध्यानाकर्षण गराएका छन्। उनले बाघ र अन्य वन्यजन्तु आक्रमण, वीरगञ्जको नारायणी अस्पतालको पूर्वाधार विकास, तथा अस्पतालहरूमा हुने लापरवाही जस्ता विषयमा सरकारलाई जिम्मेवारी बहन गर्न आग्रह गरे।

सांसद खानले पछिल्लो ६ वर्षमा बाघ आक्रमणबाट ७० भन्दा बढी मानिसले ज्यान गुमाएको तथ्यांक प्रस्तुत गर्दै वन्यजन्तु आक्रमणबाट पीडित परिवारलाई उचित क्षतिपूर्ति दिन सरकारको ध्यानाकर्षण गराए।

उनले विशेष रूपमा २०८१ माघ २५ गते बर्दिया जिल्लाको मधुवन नगरपालिका-७, गंगाबस्ती नजिकै चितुवाको आक्रमणमा परि गम्भीर घाइते भएकी ५१ वर्षीया जुना कुमारी लामिछाने क्षेत्रीको उपचारको क्रममा मृत्यु भएको घटना उल्लेख गर्दै सरकारलाई पीडित परिवारको शिक्षा, स्वास्थ्य र भरणपोषणको जिम्मेवारी लिन आग्रह गरे।

त्यस्तै, नेपाल-भारत सीमा क्षेत्रमा भारतबाट आउने जंगली जनावरहरूको आक्रमण रोक्न नेपाल सरकारले भारत सरकारसँग कूटनीतिक वार्ता गरी व्यवस्थापन गर्नुपर्ने उनको माग छ।

सांसद खानले वीरगञ्जको नारायणी अस्पतालको ऐतिहासिक महत्त्व उल्लेख गर्दै, यो अस्पताल मधेस प्रदेशका करिब ३० लाख नेपाली नागरिकका साथै भारतका सीमावर्ती नागरिकहरूको समेत भरपर्दो स्वास्थ्य सेवा केन्द्र भएको बताए।

तर, हाल नारायणी अस्पतालमा आवश्यक पूर्वाधार, जनशक्ति तथा ५०० शय्याको अस्पताल बनाउने विषयमा नागरिक स्तरबाट व्यापक जनआन्दोलन भइरहेको भन्दै उनले स्वास्थ्य मन्त्रालयको गम्भीर ध्यानाकर्षण गराए। उनले सरकारलाई यो नागरिकको जायज माग तत्काल पूरा गर्न आग्रह गरे।
सांसद खानले हाल अस्पतालहरूमा हुने लापरवाही, दक्ष जनशक्ति अभाव, र बिरामीलाई आर्थिक फाइदाका लागि अनावश्यक रूपमा अन्यत्र रिफर गर्ने प्रवृत्ति रोक्न सरकारलाई कडा कदम चाल्न आग्रह गरे।

उनले सर्लाही हरिपुर नगरपालिका-५ का रामअवतार रायका छोरा ब्रह्मदेव रायले छोरी पविता कुमारी रायलाई पित्तथैलीको पत्थरीको उपचार गराउन विभिन्न अस्पतालहरूमा दौडाउनुपरेको र लापरवाहीकै कारण बिरामी कोमामा पुग्न बाध्य भएको घटनाको उदाहरण दिँदै, पीडितलाई न्याय र उपचारको सुनिश्चितता गर्न सरकारको ध्यानाकर्षण गराए।
सांसद खानले संसदमार्फत सरकारलाई जनताको जीवन, स्वास्थ्य तथा सुरक्षाका सवालहरूमा जिम्मेवारीपूर्वक अघि बढ्न आग्रह गरे। उनले वन्यजन्तु पीडित परिवारलाई उचित राहत, नारायणी अस्पतालको स्तरोन्नति, र स्वास्थ्य संस्थाहरूमा देखिएको लापरवाही अन्त्यका लागि ठोस नीति अवलम्बन गर्न सरकारलाई निर्देशन दिन सभामुख समक्ष माग गरे।